Më 21 nëntor 2025, në sallën e Qendrës së Kulturës – Tetovë u mbajt koncerti “Parfum”, një mbrëmje e veçantë muzikore që bashkoi në skenë artistët e mirënjohur Kastriot Tusha dhe Ardian Trebicka, të shoqëruar nga Gent Rushi Band.

Koncerti u karakterizua nga një atmosferë elegante artistike, ku repertori i përzgjedhur ndërthuri këngën e kultivuar shqiptare me tema ndërkombëtare dhe interpretime të realizuara me finesë vokale e ndjeshmëri emocionale. Përmes orkestrimit të kujdesshëm dhe prezencës skenike, “Parfum” krijoi një mbrëmje të veçantë për publikun tetovar, duke sjellë emocione dhe duartrokitje të vazhdueshme gjatë gjithë koncertit.

Publiku i pranishëm pati mundësinë të përjetojë një udhëtim muzikor të ndërtuar mbi interpretim të sofistikuar, harmoni artistike dhe komunikim të afërt me skenën, duke e kthyer këtë koncert në një nga ngjarjet më të spikatura të sezonit kulturor në qytet.